Ein av bestu føroysku ítróttamonnunum nakrantíð, Sverri Jacobsen, er farin.

Sverri var í mong ár ein framúrskarandi hondbóltsspælari í Kyndli og ein framúrskarandi fótbóltsspælari í HB.

Hann vann hópin av meistaraheitum við báðum feløgum, spældi á hondbólts- og fótbóltslandsliðnum og vandi eisini mong ungdóms- og vaksnamannalið í hondbólti og fótbólti.

Í flogbólti var hann eisini millum fremstu spælarar.

Hansara genialitetir á einum hondbóltsvølli kundi ongin eftirlíkna, og stór virðing stóð um hansara tekniska og taktiska førleika allastaðni.

Tá hondbólturin sum fyrsta ítróttagreinin bjóðaði av á altjóða pallinum fyrst í 70'unum, gekk Sverri saman við øðrum góðum monnum á odda í Kyndli og á landsliðnum, og útlendingar løgdu til merkis hansara sjáldsamu góðu evnir.

Saman við okkum øllum var Sverri í høllini á Hálsi og heppaði á Kyndil, tá menninir og kvinnurnar vunnu steypakappingarnar 8. februar í 2014. Tá smíltist hann væl nøgdur um sigrarnar.

Sverri var sjúkur seinastu tíðina, og nú var tímaglasið runnið. Takk fyri alt, góði Sverri, tú verður aldrin gloymdur í Kyndli - og føroyskari ítróttasøgu!

Uni Arge, formaður Kyndils.