Hetta varð gjørt ásannandi, at fjarstøðan kann hava við sær, at tær verða heldur verri fyri enn býarpartarnir í og nærhendis Havnini.

Tað gleðiliga er longu í hesum árinum hent, at øll mál, sum koma inn frá bygdunum, fara um eina og somu skrivstovu á Vaglinum til tess at tryggja, at tey verða avgreidd rímiliga skjótt.

Hugaligt er eisini, at býráðið hevur skipað eina serstaka økisnevnd at taka stig til at menna bygdir kommununnar á øllum økjum. Økisnevndin arbeiðir í høvuðsheitum yvirskipað og tvørgangandi, men kann eisini taka upp mál fyri einstakar bygdir.

Tað er somuleiðis gleðiligt, at býráðið hevur sett ein samskipara at taka sær av málum, sum hava við økismenningina at gera.

Dømi um mál, sum økisnevndin kann taka upp eru: Útstykkingar til bústaðir og vinnu, vetrarfriðing, vegir og ferðslutrygd, vinnumenning, ferðasamband, skúlaviðurskifti, dagstovna- og ungdómsmál, ítróttar- og frítíðarvirksemi til allar aldursbólkar v.m.

Nevndin skal eisini orða ein økismenningarpolitikk fyri kommununa, seta ítøkilig mál og skjóta upp átøk, eins og hon kann møta á fundum í staðbundnu nevndunum.

Tvinni viðurskifti eru kortini, sum ikki kennast nøktandi enn.

Annað er, at økisnevndin er ikki skipað sum ein av býráðsins føstu nevndum, men sum ein undirnevnd. Tað gevur henni eina heldur veika støðu. Hitt er, at sum er hevur økisnevndin onga sjálvstøðuga játtan, tíansheldur nakran peningaligan karm at arbeiða út frá.

Tjóðveldi í býráðnum hevur nú í sambandi við fíggjarætlanina og aðrar viðgerðir í býráðnum mælt til, at økisnevndin fær støðu sum ein av føstu nevndunum við einum ávísum sjálvstøðugum fíggjarligum karmi.

Ikki fyrrenn hetta er fingið í lag, hugsi eg, at økisnevndin fær rætta flogið.

Jógvan Arge,
varaborgarstjóri og býráðslimur fyri Tjóðveldi

---