Tað verða tvey hugað lið, sum hittast til dyst í Dublin mikukvøldið. Bæðini liðini fingu javnleik á útivølli í kvøld.
Meðan Føroyar spældu 2-2 í Nikosia spældi Írland 0-0 móti Fraklandi í Paris.
Hetta boðar frá, at írska liðið er væl fyri og neyvan verður mjúkt at strúka hjá føroyingum á heimavøllinum í Dublin mikukvøldið.
Í fyrsta dystinum vann Írland lættliga 3-0 á Kýpros á heimavølli.
So er spurningurin, hvat føroyingar kunna gera móti írum. Úrslitið á Kýpros í kvøld og úrslitið móti Fraklandi herfyri eggja óivað okkara monnum til at bíta saman tenn.
Okkara royndir á írsku oynni eru ikki nógvar, men góðar. Vit hava ein javnleik móti Norðurírlandi frá 1991 at reypa av.
Okkara royndir móti Skotlandi, sum man vera javnsterkt við Írland, hava verið góðar í fleiri umførum.
So eitt væl skipað og hugagott føroyskt landslið kann saktans fáa eitt heiðursligt úrslit í Dublin.
---
