Hey Jógvan!

Eg hevði gjarna viljað vitað, hvussu tað er/verður við sjúkrahúsverkinum?

Hvat kostar sjúkrahúsverkið føroyingum um árið? Hvussu stórur partur av blokkinum verður nýttur til føroyska sjúkrahúsverkið árliga?

Hvat fer tað at kosta at senda føroyingar til Danmarkar at verða viðgjørdir á Ríkissjúkrahúsinum, um vit fáa fullveldi?

Kj

Svar:

Halló Kj!

Á fíggjarlógini fyri 2002 eru játtaðar umleið 440 mió kr. til heilsuverkið. Av teimum eru 35 mió merktar til framhaldandi útbygging av Landssjúkrahúsinum.

Tað ber ikki til at siga, hvussu nógvur blokkur fer til sjúkrahúsverkið, tí hann er ikki eyðmerktur til avís endamál. Men í 2001 brúktu vit bara 200 mió kr. av blokkinum yvirhøvur.

Føroyingar rinda longu í dag fyri ta viðgerð, sum teir fáa á Ríkissjúkrahúsinum, og almennu Føroyar brúka umleið 60 mió kr árliga upp á heilsubót uttanlands.

Mær kunnugt verður árliga gjørd ein avtala við Ríkissjúkrahúsið um kostnaðin av hesum viðgerðum. Ein partur av útreiðslunum verður eisini nýttur til viðgerð í øðrum londum.

Av teimum 60 mío fara einar 10 mió til at flyta sjúklingar og avvarðandi millum londini, og aðrar 10 mió fara til Hotel Tórshavn í Keypmannahavn, sum hýsir sjúklingum og avvarðandi, ið verða send niður til viðgerðar.

Fullveldi í sjálvum sær dýrkar ikki hesar tænastur, men avtalurnar skulu sjálvandi gerast av nýggjum so hvørt – og í framtíðini verða avtalur kanska eisini gjørdar við onnur lond.

Vóni tú ert nøgdur við svarið

Vinarlig heilsan

Jógvan.