Hey Jógvan:

Ert tú einigur við mær, tá id eg sigi, at tað eru alt ov fá ung tjóðveldisumboð, ið stilla upp.

Unglingi

Svar:

Halló unglingin!

Eg haldi ikki, at tað er so galið. Hygg at listanum hjá okkum vesturi í Vágum. Har eru ikki minni enn trý rættiliga ung fólk uppstillað saman við einum, sum ofta hevur verið valevni.

Her í Suðurstreymi hava vit nógvar ungdómar, sum heldur vilja arbeiða fyri flokkin á annan hátt, enn akkurát at stilla seg upp.

Unga Tjóðveldið er sera virkið við ymsum tiltøkum sum konsertum og politiskum fundum.

Felagið gevur eisini út valtilfar, sum vendir sær til tey ungu í landinum. Nú ein dagin fekk eg eitt faldiblað upp í hondina, sum er sera væl skrivað og áhugavert at lesa.

Niðurstøðan er soleiðis orðað:

"Tann 30. apríl skalt tú velja, um tú vilt vera partur av framburðinum ella av tí svarta afturhaldinum. Vónandi velur tú framburðin.

Tí sjálvandi er føroyska tjóðin eins og aðrar tjóðir før fyri at taka fulla ábyrgd av landinum. Vit eru ikki býttari enn onnur fólk. Vit kunnu standa uppi sum onnur.

Tað snýr seg bara um viljan – og um tína atkvøðu.

www.ut.fo"