"Sukurmolin á Boðaneshamrinum" er heitið á Opus 1 hjá Jógvani Arge í málningalistini.
Jógvan var ein av teimum mongu, sum fekk áheitan um at gera ein málning til uppboðssøluna á Landssjúkrahúsinum leygardagin.
Hann hevur fyrrapartin verið í atelierinum hjá listarmanninum Eyðuni av Reyni og fingið málningin frá hondini.
Jógvan hevði frammanundan avgjørt, hvat motivið skuldi vera, og tað gekk bara heilt skjótt at smyrja litirnar upp á løriftið.
Fyrst hevði Eyðun kortini lagt lag á at blanda litirnar, eisini við terpentini, so verkið hevði ein tjans at verða turt, tá tað skal seljast í morgin.
Trý korter til ellivu var málningurin liðugur, og Eyðun hevði á orði, at her hevði listarmaðurin óivað tjent eina góða tímaløn.
Heitið sigur alt um motivið. Vit kunna eisini avdúka, at stílurin er reinur og litirnir fáir.
Pengarnir fara til bussin, sum Landssjúkrahúsið ætlar at keypa sjúklingum.
Góðan keypihug!
---
