Halló Jógvan:

Allir tjóðveldismenn atkvøddu fyri, at Kollafjørður og Havnin løgdu saman. Tað, sum búði undir, var helst, at tað er bíligari við stórum eindum.

Er tað ikki dupultmoralur, tá ið so somu tjóðveldismenn vilja loysa frá Danmark? Eru vit ikki sterkari sum ein stór eind?

Kollfirðingur

Svar:

Hey kollfirðingur.

Eg haldi ikki, at høvuðsargumentið hjá havnarmonnum fyri at leggja saman við Kollafirði var, at teir sóu sær nakrar sparingar, tí at eindin gjørdist størri.

Tað var heldur tað, at Kollafjørður hevði nakað at bjóða, sum Havnin hevði ov lítið av. Til dømis møguleikar fyri havnarbygging, sum Tórshavnar Kommuna eisini hevur gjørt nógv við hesa stuttu tíð, Kollafjørður hevur verið partur av Tórshavnar Kommunu.

Eg haldi heldur ikki, at støðutakan fyri samanlegging av kommunum í Suðurstreymi og stevnan um einar frælsar Føroyar hava nakað við dupultmoral ella tvístøðu at gera. Tvørturímóti. Betri eindirnar eru í Føroyum, sterkari verður heildin Føroyar.

Vinarlig heilsan

Jógvan.