Hey Jógvan: Tað ljóðar, at ávísir býráðspolitikarar í Havn eru farnir at arbeiða fyri, at m.a. Argja Róðrafelag skal hava part av inntøkuni av ólavsøkukappróðrinum.

Kjakast hevur verið um málið fyrr, men tað hevur so lagt seg aftur. Nú frættist, at áheitan er komin frá róðrarfelag í Tórshavnar Kommunu, um at býráðið tekur málið upp.

Havnar Róðrarfelag hevur síðan 1932 skipað fyri kappróðri á ólavsøku, og ger tað til UG hvørt ár.

Er tað rætt, at onnur feløg nú skula taka lut í skipan av kappróðrinum á ólavsøku, tá Havnar Róðrarfelag ger hettar til UG hvørt ár.

Hvat er tín meining um hesi viðurskifti?

Heilsan ..ein áhugaður

Svar:

Halló áhugaði. Eg haldi ikki, at tað er ein spurningur fyri býráðið at avgera, hvør skipar fyri kappróðri á ólavsøku.

Sum tú sigur, so hevur HR skipað fyri honum síðani 1932. Hevur nakar hevd upp á ólavsøkuróðurin, er tað Havnar Róðrarfelag.

Sum eg skilji, hevur Argja Róðrarfelag áður biðið um at sleppa upp í part, men onki kom burturúr.

Áheitanin er endurtikin í hesum árinum, men mær vitandi ikki viðgjørd. Hvat ið kemur burturúr, dugi eg ikki at siga, men eg hevði hildið, at hetta er ein spurningur fyri feløgini sjálvi at finna útav.

Vinarlig heilsan

Jógvan.