Til Jógvan Arge

Nú hoyrist, at Kirkjubøarstólarnir langt um leingi sleppa heimaftur. Ein verkætlan er gjørd, sum snýr seg um at fáa teir inn aftur í sóknarkirkjuna í Kirkjubø. Her hava teir staðið í kanska 350 ár.

Vilja tygum á tingi ella í landsstýri arbeiða fyri, at hesir virðismiklu lutir aftur sleppa á ta pláss, teir vóru rændir frá?

Vinarliga

Jóannes Patursson

Svar:

Halló Jóannes! Skilji væl, at tú ert spentur nú. Tað ljóðar eisini sera spennandi í mínum oyrum, at tað loksins eru komnir hagar til, at Kirkjubøstólarnir koma aftur til Føroya at vera. Betri fornminni eiga vit valla.

Sum eg havi skilt tað áralanga stríðið um at fáa teir heimaftur, hevur ein treyt verið, at vit hava hølisumstøður at goyma teir forsvarliga, so teir ikki forfarast.

Kann hetta sjónarmiðið um varðveiting sameinast við at seta stólarnar aftur í sóknarkirkjuna í Kirkjubø, verður ringt at fáa meiri fullfíggjaða loysn.

Vinarlig heilsan

Jógvan Arge