Spurningur: Hey Jógvan. Hvat sigur tú, um fólk fara at siga, at tú hevur brúkt útvarpið sum eina lopfjøl fyri at blíva ein populerur, fólksligur politikari - eins og sagt varð um Høgna og hansara tilknýti til SvF?
Eg seti spurningin, tí flestu føroyingar hava eitt heilt serligt tilknýti til tína rødd sum eina objektiva og álítandi almenna rødd.
Heilsan EB.
Svar. Halló EB. Fyrst takki eg tær fyri tey vøkru orðini. Tað gleðir meg, um støðan er, sum tú sigur.
Eg havi verið í føstum starvi í ÚF alt mítt vaksna lív. Mítt arbeiði hevur verið at reka ábyrgdarfullan journalistikk og annað upplýsandi programvirksemi. Eg eri fegin um, at tað eftir tíni meting hevur eydnast væl.
Brúkt ÚF sum lopfjøl til politikk? Kanska, men tað hevur so verið ein fjøl við lítlum springi í, tí eg havi verið 32 ár í føstum starvi, og havi bara verið fólkavaldur eitt ár.
Menn legg tær í geyma, at um røddin er objektiv, álítandi og almenn, so er hon kortini framvegis mín.
Vinarlig heilsan
Jógvan Arge X við E.
