Spurningur: Lat okkum siga, at tjóðveldisflokkurin fær báðar menninar, og tú og Tobbi koma á danating. Hvat fara tit so at gera har niðri? Eg meini kunnu tit trýsta eina veruliga avtalu við danir ígjøgnum?

Páll

Svar: Fáa vit tveir mans, er tað dupult so gott, sum at fáa ein. Í hesum fólkatingsvalinum síggi eg fyrst og fremst møguleikan at vinna tjóðveldisflokkinum og hansara stevnumiði stóra undirtøku, tí eg haldi, at tað hevur alstóran týdning fyri sjálvstýrismálið, at føroyingar senda eitt sterkt sjálvstýrisignal til Keypmannahavnar.

Størri undirtøku, stevnan hjá tjóðveldinum fær, sterkari verður signalið.

Ætlanin hjá fólkatingsmonnum úr tjóðveldisflokkinum er ikki at sita leingi á danatingi. Vit vilja taka hesar sessirnar av sum skjótast og fara at virka fyri tí.

Vit fara ikki at luttaka í donskum innanríkispolitikki, men býðst tann møguleikin, tá stjórn verður skipað, verður mandatið nýtt til at tryggja Føroyum viðurkenning sum tjóð. Annars verða samráðingarnar landanna millum enn sum áður millum landsstýri og stjórn.

Heilsan og gott val

Jógvan Arge