Tað, sum selt verður í hesum umfarinum, er ein partur av tí, sum kommunan herfyri keypti frá Eik, ið sat við búnum eftir stóru útstykkingarætlanina undir Kongavarða. Tað, sum byggjast skal, skal í mesta mun samsvara við niðastu raðhúsini, sum eru gjørd undir Kongavarða.

Tvey broytingaruppskot vóru frá minnilutanum, tá málið var fyri í býráðnum hóskvøldið. Annað var um, at bústaðirnir, sum koma burtur úr ætlanini, verða bodnir teimum, sum standa á bíðilistanum, ið kommunan hevur havt í mong Harrans ár.

Hetta varð skotið upp, tí vanligt er, at tá kommunan útvegar jørðina, verða bústaðirnir bodnir fólki á bíðilistanum. Soleiðis varð eisini gjørt í fyrra umfarinum undir Kongavarða.

Kommunan keypti fyrst jørðina frá Búnaðarstovuni og seldi hana víðari til partafelagið fyri sama prís, sum hon hevði fingið hana fyri, treytað av, at bústaðirnir vórðu bodnir út eftir bíðilistanum.

Uppskotið um eisini at brúka bíðilistan hesaferð fekk eina ringa lagnu. Bert tríggjar atkvøður vóru fyri úr Tjóðveldi. Ikki minni enn 9 atkvøður úr samgonguni vóru ímóti, meðan ein ikki greiddi atkvøðu.

Okkum fyrikemur hetta at vera eitt týðuligt tekin um, at ein stór høgrasnaring er farin fram á Vaglinum, nú Javnaðarflokkurin situr við reinum meiriluta við Fólkaflokki og Sambandsflokki sum hjáflokkum.

Tá lopið verður bukk um bíðilistan merkir tað, at bústaðirnir, sum koma burtur úr hesi kommunalu jarðarútvegan, verða seldir í fríari sølu – t.e. fyri hægstabjóðandi – og tey, sum hava staðið stytri og longri á bíðalista verða við sviðið soð. Her eru bara frítt slag og størstu mappurnar galdandi.

Hitt broytingaruppskotið var um, at kommunan gjørdi byggibúningina lidna sjálv til tess at tryggja sær, at hon verður í lagi. Heldur ikki hetta broytingaruppskot vann fram. Úrslitið var tað sama, tríggjar fyri og níggju ímóti. Upplýst varð í málinum, at stór ógreiða er um, hvørjar innleggingar eru tøkar á økinum, sum selt verður.

Jógvan Arge, býráðslimur í Havn fyri Tjóðveldi

---