30.03.2002 | Evni: Løgtingið
Okkara land - einar frælsar Føroyar
Skriva út | Send | Aftur
Okkara land - einar frælsar Føroyar fyri øll

"Eftir at Tjóðveldisflokkurin hevur sitið í landsins leiðslu í 4 ár, hava vit ongantíð verið nærri einum frælsum Føroyum og einum sjálvberandi búskapi. Eitt trygt vælferðarsamfelag fyri allar føroyingar er nærri enn nakrantíð.

Vit eiga eitt dugnaligt og arbeiðssamt fólk. Eitt stolt og sjálvberandi vinnulív. Vit eiga eitt nýhugsandi og ríkt mentanarlív og ein blómandi ungdóm, ið ynskir javnbjóðis samband og samstarv við allan heim - sum føroyingar.

Føroysk oljuvinna er veruleiki, og vit eru á veg móti nýggjum avbjóðingum og menningarmøguleikum.

Hetta krevur, at vit halda fast við sjálvbjargniskósina og hava dirvi at taka við ábyrgdini.

Løgtingsvalið 2002 er tí eitt avgerandi val fyri framtíðina hjá øllum føroyingum.

Løgtingsvalið er eitt val millum at taka ábyrgd ella at leggja frá sær ábyrgd – valið er Føroya fólks.

Tjóðveldisflokkurin vil í komandi valskeiði m.a. virka fyri:

  • at kósin verður hildin móti frælsum Føroyum
  • at framhaldandi verður rikin ein skynsamur búskaparpolitikkur
  • at átroðkandi tørvurin á eldrarøkt, dagstovnum og bústøðum verður nøktaður
  • at almanna- og heilsuverkið verður endurskoðað, ment og lagað til føroysk viðurskifti
  • einum frælsum vinnulívi undir støðugum kørmum
  • at grundlógarfesta, at alt tilfeingið – eisini ráevnini í undirgrundini - er ogn Føroya fólks
  • at skipa ein føroyskan skúla til føroyskan tørv
  • at mentan skal framhaldandi raðfestast høgt
  • at børn og ung hava rætt til mentanarlig tilboð, útbúgving, ávirkan og virkna luttøku í samfelagnum
  • at farið verður í hernað móti rúsevnisminýtslu við upplýsing, fyribyrging og viðgerð
  • at ein heildarætlan skal gerast fyri økismenningina fyri at tryggja framhaldandi búseting og trivnað í øllum økjum og
  • at landsumsitingin verður skipað til føroyskan tørv.

    • Tjóðveldisflokkurin vil halda fram í landsins leiðslu fyri at tryggja eina ábyrgdarfulla kós við støðugari menning fyri føroysku tjóðina fram ímóti føroyskum fullveldi.

    Tjóðveldisflokkurin stendur við sínar hugsjónir og førir tær út í lívið".

    Soleiðis samtykt á flokstingi heima á Sandi 15. og 16. mars.

    ---

    < Havnin, hernaður og hóttan | Studningur til lesandi í fullveldinum >